ՀՀ էկոնոմիկայի նախարարի տեղակալ Էդգար Զաքարյանը հունիսի 4-ին այցելել է «Սովթ Պապիրուս» ընկերություն, որը Հայաստանի հիգիենայի և սանիտարահիգիենիկ թղթային արտադրանքի ոլորտի առաջատար կազմակերպություններից է և ընդգրկված է ՀՀ 1000 խոշոր հարկատուների ցանկում։ «Սովթ Պապիրուս» ընկերությունը հիմնադրվել է 2014 թվականին և մասնագիտանում է խոհանոցային սրբիչների, անձեռոցիկների, զուգարանի թղթի, թղթե սրբիչների և այլ սանիտարահիգիենիկ թղթային արտադրատեսակների արտադրության մեջ։ Արտադրության արդիականացման և հզորությունների ընդլայնման նպատակով ընկերությունն օգտվել է պետական աջակցության մի շարք գործիքներից, մասնավորապես՝ մաքսատուրքից ազատման արտոնությունից և լիզինգի պետական աջակցության ծրագրից։ Այցի ընթացքում Էդգար Զաքարյանը, ընկերության ղեկավար Տիգրան Կարապետյանի ուղեկցությամբ, շրջել է արտադրամասերում, ծանոթացել արտադրական գործընթացներին, կիրառվող տեխնոլոգիական լուծումներին, արտադրական հզորություններին և որակի վերահսկման համակարգերին։ Քննարկվել են ընկերության զարգացման հեռանկարները, արտադրության ընդլայնման ծրագրերը, ինչպես նաև ոլորտի զարգացմանը, ներդրումային միջավայրի բարելավմանը և մրցունակության բարձրացմանը վերաբերող հարցեր։

ՀՀ էկոնոմիկայի նախարարի տեղակալ Էդգար Զաքարյանը հունիսի 3-ին այցելել է «Վալան Գրուպ» ընկերություն, որը հանդիսանում է Հայաստանի կահույքագործության ոլորտի առաջատար ընկերություններից մեկը։ «Վալան Գրուպ»-ը հիմնադրվել է 2001 թվականին և մասնագիտանում է ալյումինե և մետաղապլաստե դռների ու պատուհանների համակարգերի նախագծման և արտադրության, ինչպես նաև բարձրորակ կահույքի արտադրության ոլորտներում։ Արտադրության արդիականացման և ընդլայնման նպատակով ընկերությունն օգտվել է պետական աջակցության մի շարք գործիքներից, մասնավորապես՝ մաքսատուրքից ազատման արտոնությունից և լիզինգի պետական աջակցության ծրագրից։ Այցի ընթացքում Էդգար Զաքարյանն ընկերության հիմնադիր Սարգիս Կարապետյանի ուղեկցությամբ շրջել է արտադրամասերում, ծանոթացել ընկերության գործունեությանը, արտադրական գործընթացներին, կիրառվող տեխնոլոգիական լուծումներին և ներդրված սարքավորումներին։ Շրջայցի ընթացքում ներկայացվել են ընկերության զարգացման առաջիկա ծրագրերը, ինչպես նաև քննարկվել են ոլորտի զարգացմանն առնչվող մի շարք հարցեր։

ՀՀ էկոնոմիկայի նախարարի տեղակալներ Արման Խոջոյանն ու Նարեկ Հովակիմյանը հունիսի 1-ին հանդիպել են ՀՀ-ում Արաբական Միացյալ Էմիրությունների, Քուվեյթի, Իրաքի և Քաթարի դեսպանների ու դիվանագիտական ներկայացուցիչների հետ։ Հանդիպման ընթացքում քննարկվել են Հայաստանի և գործընկեր երկրների միջև առևտրատնտեսական գործակցության ընդլայնման և արտահանման խթանման հեռանկարները, ինչպես նաև տնտեսության դիվերսիֆիկացմանն ուղղված նախաձեռնությունները։ Անդրադարձ է կատարվել արտահանման ոլորտում ներկայումս առկա մարտահրավերները նոր հնարավորությունների վերածելու ուղիներին, գործարար կապերի ակտիվացմանը, ինչպես նաև փոխադարձ հետաքրքրություն ներկայացնող ոլորտներում համատեղ ծրագրերի իրականացման հնարավորություններին։ Կողմերն ընդգծել են առևտրատնտեսական կապերի հետագա խորացման պատրաստակամությունը՝ վերահաստատելով փոխշահավետ գործակցության կարևորությունը։